కవిత

మేడే

- డా. ఎస్. బషీర్, చెన్నై.

అరుణిమ కాంతులతో
విశ్వమంతా ధగ ధగ మెరిసింది
ధరణి అంతా ఎర్రటి కుంకుమంలా విరిసింది
ఆనంద తరంగాలు నింగికెగిసాయి
అందరి చేతులలో ఎర్ర జండాలు రెపరెప లాడాయి
సర్వత్రా శ్రామిక స్వరం హోరెత్తింది
పులకించి – పదండి ముందుకు అని సాగింది
పిడికిలి బిగించి మేఘాలతో గొంతు కలిపింది
సూర్యరశ్మికి స్వేద జలం వెండిలా మెరిసింది
భావితరాలకు విశ్వాసకిరణాలను కురిపించింది
ఈ మేడే రోజున....
జగతిన విజయ నగారా మ్రోగింది.