Monday, January 26, 2009

సాహితి పాఠకులకు, రచయితలకు గణతంత్ర దినోత్సవ శుభాకాంక్షలతో....ఒక కథానిక, ఓ దీర్ఘ కవిత



కథానిక
(రాయలసీమ మాండలికం)


జెండా రోజూ ఎగరల్ల


- డా।। సి. జయ శంకర బాబు


అయ్య అమ్మ
అక్క అన్న అందరూ
గాసానికి రెక్కాడిస్తేనే
అబ్బిగాడి మూతికి మెతుకు దక్కేది
ఇక వాడి డొక్కకు గుడ్డెక్కడిది!
సదువు సందె మాట
దేవుడెరుగు!
“పిల్లాడిని బడికి పంపీండని”
అయివారమ్మలంటే
“గతికేకి మెతుకే కరువు
అతికేకి కోకా కరువు
మాకేటికమ్మా సదవు”
అంది అబ్బిగాడి అమ్మ.
ఓటేసికి పోతే
అబ్బిగాడి అయ్యకు
దక్కిందొక జెండాగుడ్డ
సించి అతుకులేస్తే అదే
అబ్బిగాడికి నిక్కరూ సొక్కా!

సొక్కా నిక్కరు తొడిగిన అబ్బిగాడు
బడంటే ఏందో సూద్దామని పోతే
ఊరూ గేరులో ఉండే పిల్లగాళ్ళంతా
ఆడ సుట్టూ నిలబన్నారు
మద్దెలో ఓ గుంజ పాతినారు
దానికి తాడు గట్టినారు
గుసగుసలాడే బడిపిల్లల మాటలు
అబ్బిగాని సెవిన పన్నాయ్ -
“రోంచేపుంటే శాకిలెట్టిత్తారంట”
ఆశతో జొల్లుగారుస్తూ
అబ్బిగాడు నిలబన్నాడు.
బడిపిల్లల గుంపులో
అయ్యవారొచ్చి
గుంజకుండే తాడు ఇట్టాఇగ్గితే
పూలూ రంగుకాయితాలూ రాలినాయి
అంతా తలకాయిపైన సెయిపెట్టి
పైకి సూత్తాంటే
అబ్బిగాడూ సూసినాడు
ఓ గుడ్డ పేలిక గాలికెగురుతాంది
రత్తం లాగ ఎర్రగా
సున్నంలాగ తెల్లగా
ఆకులాగ పచ్చగా ఉంది
నడాన బండిసెక్రం
అబ్బిగాడి బుర్రలో ఏందో మెదిలింది...
“అయ్యకు సెప్పితే …”
ఇంతలో “జన గణ మన….” అంటూ
అంతా ఏదో పాడుతున్నారు
చివరికి “జయ జయ…” అంటుండగా
అబ్బిగాడు కూడా అరిసినాడు
“జై జై” అని
“ఇంగ అందరూ వర్సగా బల్లోకి పోండి
శాకిలెట్లిస్తారు”
పొడూగుండే పోరగాడన్నాడు.
పిల్లగాల్లంతా లోపలికి పోతాంటే
ఆడే గోడ పంచన నిలబన్నాడు
అబ్బిగాడు బిక్కుబిక్కుమంటూ
బల్లో అందరికీ శాకిలెట్లు పంచినంక
ఒగయివారొచ్చి బైట నిలబడిండే
పిల్లగాల్లకి సాకిలెట్లిచ్చినాడు
అబ్బిగాడికీ ఒగటి సిక్కింది
జోబులోబెట్టుకోని
ఇంటికి పారొచ్చి
అమ్మకీ అయ్యకీ
అక్కకీ అన్నకీ
సూపిచ్చి
“బల్లో జెండా ఎగిరేసినారు
నాకూ శాకిలెట్టిచ్చినారు”
అని వాడు సప్పరిస్తాంటే
సోతంత్రమంటే
అంత తియ్యగా ఉంటాదని
వాడి అమ్మకు, అయ్యకు
అన్నకు, అక్కకు అనిపించింది
“జెండా రోజూ ఎగరల్ల”
అబ్బిగాడు ఆశతో అన్నాడు
శాకిలెట్టు జుర్రుకుంటూ...





కవిత



గణతంత్రం .... మనకు శ్రేయో మంత్రం



- డా।। సి. జయ శంకర బాబు




జన గణ మన ఆశల ఫలితం
భారతానికి దక్కిన స్వాతంత్ర్యం
ఘనకీర్తి గలిగిన భారతీయ వీరుల
ఐకమత్య పోరాటాలకు
దక్కిన సుఫలం గణతంత్రం
జనులెల్లరకూ సమానాధికారాన్ని
కట్టబెట్టే జనస్వామ్యాన్ని
ఆదరించి అలవర్చుకున్నాం
భాషలెన్నైనా భావమొక్కటేనంటూ
రంగురూపాలేవైనా
భారతీయులందరూ ఒకటేనంటూ
క్రమశిక్షణే జాతి లక్షణంగా
ఐకమత్యమే మహాబలంగా
జన గణాల చైతన్య గమనంతో
సార్వభౌమాధికార సామ్యవాద లౌకిక ప్రజాస్వామ్య
గణతంత్రంగా వర్ధిల్లింది భారతావని
నేడు మన గణతంత్రానికి షష్టిపూర్తి
అరవై వసంతాలు పూర్తిచేసుకున్న
భారత గణతంత్రం
జగతిలోకెల్ల గొప్ప జనస్వామ్యంగా,
మారుతున్న ప్రపంచానికి మార్గదర్శిగా
అన్నింటా ముందంజంగా
అడుగులు వేస్తోంది.
శాంతికాంక్షతో మనం
అజాత శత్రువులుగా వర్ధిల్లాలనుకున్నా
అతివాదం అట్టహాసంగా
శాంతి పావురాన్నే
మింగేస్తానంటూంటే
జాతి రక్షణే ధ్యేయంగా
మన జవానులు
సన్నద్దులై ప్రాణాలొడ్డుతున్నారు
పోరులూ, ఆర్థిక మాంధ్యాలు
కరువులూ కాటకాలు
ప్రపంచాన్ని పీడిస్తున్నా
సస్యశ్యామల భారతావని
తన జన గణాలనెల్లా
చల్లగా కాపాడుతోంది
భారత గణతంత్రానికి
నేడు అరవయ్యవ వసంతోత్సవం
మనకందరికీ ఇది ఆనందోత్సవం

భాషకొక రాష్ట్రమంటూ
భాగాలేనాడో పంచుకున్నాం
మరళా ఇప్పుడు
కుండలు పంచుకోవటమేంబాగు ?
మన భాషలన్నీ
భారతమాత పలుకు తేనెల తియ్యదనమే
ఇప్పుడు మాది పాత మీది రోతంటూ రోషాలెందుకు
మాది గొప్ప మీది దిబ్బ అనే వేషాలెందుకు
భాషయేదైనా మన మధ్యన ప్రేమను పెంచేందుకేగాని
ద్వేషాగ్నిని రగిలించేందుకు కాదుగదా!
మనలో మనకు పోటీలెందుకు?
హిందువులైనా, మహమ్మదీయులైనా
క్రైస్తవులూ, జైన, బౌద్ధ, సిక్కు, జొరాష్ట్రియనులైనా
మనమంతా మానవీయతను కోరుకునే
భారతీయులమే కదా!
మరి మన మధ్య విభేదాలెందుకు?
జనలందరికీ సమానాధికారాన్నిచ్చిన
జనస్వామ్యంలో
కూడూ, గూడు, గుడ్డతో పాటు
మానం మర్యాదలుంటే చాలు కదా!
దౌర్జన్యాలూ, అవినీతి దారులూ
లంచగొండి దగా బతుకులెందుకు?
భారతీయులంతా ఆత్మీయభావంతో
ఐకమత్యంతో క్రమశిక్షణతో ఉంటే
శ్రమయే సేవగా భావించి
చైతన్యజీవనం సాగిస్తే
కరువులూ కాటాకాలూ
చోరులూ కిరాతకులూ
ఎవరూ మనల్నేమీ చేయలేరు
దేశమాత సేవకై
శిరసువంచి నిలబడే జనగణాలుంటే
జాతికి గణతంత్రం
అదే మనకు శ్రేయోమంత్రం!
మన జాతీయ ఝండా
రెప రెపలాడుతూ
మనందరికీ శాంతిసౌభాగ్యాలనందిస్తూ
నేటికి అరవై వసంతాలు పూర్తిచేసుకుంటోంది
ప్రతి అడుగూ ప్రగతి వైపే అంటూ
జగతికి తలమానికమైన భారతావణి
మనందరికీ గర్వకారణం...
జయహే జయహే భారతమాతా
నీకివే మాజోహార్లు
జై భారత్!

Saturday, January 24, 2009

కవిత

నేడు జాతీయ బాలికా దినోత్సవ సందర్భంగా సాహితి లో గతంలో ప్రచురితమైన కవిత అమ్మాయిలు పునః ప్రకాశితం (యుగ్ మానస్ మరియు సాహితి లో వచ్చిన స్పందనలతో పాటు)



అమ్మాయిలు

- డా. బషీర్, చెన్నై



అమ్మాయిలు
కంటికి రూపాలు
ఇంటికి దీపాలు
ముఖారవిందాలు
దేవుడి వరాలు
కలవారికి ఐశ్వర్యాలు
లేనివారికి ఆత్మస్థైర్యాలు

అమ్మాయిలు
వాడని వసంతాలు
వీడని సుమధుర భావాలు
తరగని అమృతభాండారాలు
అమరప్రేమకు నిర్వచనాలు
జన్మ-జన్మల అనుబంధాలు

అమ్మాయిలు
ఆశయాలకు ప్రతిబింబాలు
ఆశలకు ఊపిరులు
అనురాగాలకు ముద్దుమురిపాలు
ఆప్తుల పెదవులపై చిరునవ్వులు
కుటుంభాలకు సజీవ ప్రతిరూపాలు

అమ్మాయిలున్న ఇళ్ళు
స్వర్గానికి నిలయాలు
మమతల కోవెలలు
సుఖశాంతుల లోగిళ్ళు
లక్ష్మీసరస్వతుల సంగమాలు

అమ్మాయిలున్న ఇళ్ళు
కోటి దీపాల వెలుగులు
లక్ష తారకల జిలుగులు
సంగీత సుధారస భరితాలు
జననీ జనకుల జీవనసఫలాలు

అమ్మాయిలున్న ఇళ్ళు
ప్రతిరోజూ పండుగలు
హోళీ దసరా దీపావళీలు

అమ్మాయిలు జాతికి చిహ్నాలు
దేశానికి గర్వకారణాలు
చరిత్రకు దర్పణాలు
నాగరికతకు కీర్తిపతాకాలు
దేశాభ్యుదయాని రథసారథులు

అమ్మాయిలే నాటికి నేటికి ఏనాటికి
తరగని కరగని అలుపెరగని అసమాన ధనులు
యోధులు, ధురంధరులు
అభిమానవతులు,
అజరఅమరఅఖిల జగాలలో
చరితార్థులు విద్యావేత్తలు
కారణజన్ములు
ప్రగతికి రథచక్రాలు
ఈ జగతికి సూర్యచంద్రులు

అమ్మాయిలే
సమస్తమానవాళికి
జీవనప్రదాతలు.




md said...
girl children are the gift of GOD which are reflected and highlighted in this poetry are appreciable.THE MESSAGE should be given wide publicity which is essential for the developement of WOMENHOOD
October 24, 2008 11:05 AM

Mrs. Asha Joglekar said...हर घर में बेटियाँख़ुदा का उपहार हैंमहकती बसंत बहार हैंपरिवार का दुलार हैंबहुत सुंदर पंक्तियाँ । कविता भी सारी बहुत भावभरी । October 18, 2008 12:19 PM

Reetesh Gupta said...बहुत सही ..अच्छा लगा...बधाईOctober 18, 2008 1:32 PM

Reetesh Gupta said...बहुत सही ..अच्छा लगा...बधाईOctober 18, 2008 1:32 PM

Sherfraz said...Bahut Khoobsurat hai. Bhavnayen lajavab hai.Sherfraz Nawaz.October 21, 2008 8:50 AM

Shashank said...Poem betiyaan is very nice. It shows the affection, respect for a girl child. Need of the hour.I wish this reaches the remotest of villages where girls are considered a burden even today.
N.Padmavathi

మీ స్పందనలకు స్వాగతం

Monday, January 19, 2009

నాట్యమయూరి శివాణి


సాహితి అభినందన


ప్రముఖ రచయిత, దక్షిణాది సినీరంగ ప్రముఖులు శ్రీ గొల్లపూడి మారుతిరావు గారి ముద్దుల మనుమరాలు (శ్రీ సుబ్బారావు, శ్రీమతి కుమారి ల గారాలపట్టి), రేవతి రామచంద్రన్ గారి శిష్యురాలు కుమారి జీ. శివాణి భరతనాట్య ప్రతిభ ‘అమోఘం అద్భుతం’ అని ఎందరో ప్రేక్షకులు కొనియాడారు ఇటీవల చెన్నైలో శివగామి ఆడిటోరియంలో జరిగిన ఆమె నాట్యప్రతిభను నాట్యాభిమానులు వేనోల్ల కీర్తించారు. శివాణి ఉజ్జ్వల భవిష్యత్తును కాంక్షిస్తూ, ఆమె మరిన్ని ఉన్నత ప్రతిభా శిఖరాలనధిరోహించాలని సాహితి అభినందన.

Wednesday, January 14, 2009

సంక్రాంతి శుభాకాంక్షలు

చిత్రకారుడు - మాస్టర్ విజయేంద్ర బాబు
సాహితి పాఠకులకు, రచయితలకు సంక్రాంతి శుభాకాంక్షలు

Thursday, January 1, 2009

జనవరి 9,10, 11 న


ప్రపంచ తెలుగు సమాఖ్య 8వ అంతర్జాతీయ సదస్సు విజయవాడలో....


తెలుగు భాష, సంస్కృతి, కళలు, వారసత్వ పరిరక్షణే ధ్యేయంగా పురోగమిస్తున్న సామాజిక సాంస్కృతిక సంస్థ ప్రపంచ తెలుగు సమాఖ్య (World Telugu Federation), చెన్నై ఆధ్వర్యంలో జనవరి 9,10, 11 న విజయవాడలో 8వ అంతర్జాతీయ సదస్సు జరుగనున్నట్లు ఆసంస్ధ అధ్యక్షురాలు శ్రీమతి వి.ఎల్. ఇందిరా దత్ సంస్ధ వెబ్ సైట్ లో ప్రకటన జారిచేశారు. సదస్సులో భాగంగా నిర్వహింపనున్న చర్చాగోష్ఠులలో విభిన్న రంగాలకు చెందిన ప్రముఖులు తెలుగు భాష, సాహిత్యం, నృత్యం, సంగీతం, చలనచిత్రం, ఇతర లలితకళలకు సంబంధించిన సమస్యలతో పాటు నేటి ప్రముఖ విషయాలైన వర్తక, వాణిజ్య, పరిశ్రమల రంగం, విజ్ఞానం, టెక్నాలజీ, ఆరోగ్యం, వైద్యవిజ్ఞానరంగాలకు సంబంధించిన తాజా పరిస్ధితుల గురించి తోపాటు చర్చిస్తారు. సదస్సు జయప్రదం కావాలని సాహితి అభిలషిస్తోంది. సదస్సులో పాల్గొన దలచినవారు మరిన్ని వివరాలకు సమాఖ్య వెబ్ సైటు ను సందర్శించగలరు.

శుభాకాంక్షలు



నూతన సంవత్సరంలో పవిత్ర వైవాహిక బంధంతో క్రొత్తదంపతులుకానున్న సందర్భంగా యువకెరటాలు రామిరెడ్డి, నవీన లకు నూతన సంవత్సర శుభాకాంక్షలు.