ఒంగోలు లో జనవరి 8,9 మరియు 10 తేదీన జరిగిన 6వ రాష్ట్రస్థాయి రచయితల మహాసభలో బి. హనుమారెడ్డి (అద్యక్షులు, ప్రకాశం జిల్లా రచయితల సంఘం ) చేతులమీదుగా కవితాపురస్కారాన్ని అందుకుంటున్న శ్రీమతి ములుగు లక్ష్మీ మైథిలిగారు.
ఆత్మీయానుబంధాలకు స్వాగతం! సుస్వాగతం!!
- డా. బషీర్, చెన్నపట్టణం.
కొత్త ఆశయాలకు కొత్త భావాలకు
పరికల్పనలు బంగారు కలలకు
కొన్ని సత్యాలకు, స్నేహ బంధాలకు
త్యాగాలకు రాగాలకు
ఆత్మీయానుబంధాలకు స్వాగతం! సుస్వాగతం!!
2010 నీకు ఘన స్వాగతం
పరిగెడుతున్న కాలం పురివిప్పింది నెమలిలా
వేయి వీణలను మీటి నవ వసంత, సలలిత రాగసుధా గానాన్ని
వినిపించి వీనుల విందు చేసింది
నవ జ్యోతులను వెలిగించింది
ప్రతి అణువు పులకించింది
ప్రతి గుండె ఆనందంతో పరవశించింది
జగతిన క్రొత్త సంవత్సరం మెరిసింది
విశ్వవేధికపై మధువసంతం మురిసింది
జీవితాలకు క్రొత్త ఊపిరి పోసింది
2010లోనైనా మానవతకు విలువ ఉంటుందని ఆశిద్దాం
జాతి, మత, భాషా ప్రాంతీయ భేదాలు విడనాడి
విశ్వశాంతికై ఐక్యతాగీతాన్ని పాడుకుందాం.
హైకూలు
- డా. ఎస్. బషీర్, చెన్నై.
కొన్ని బంధాలు
కాయిన్ బాక్సులు
డబ్బిస్తేనే పలుకు
భీకర యుద్ధం
శవాల గుట్టలు
రాబందుల పండుగ
గడ్డి పరక
భయంతో వణుకుతూ పాపం
హిరోషిమాలో మొలకెత్తు
బంధాలు -పర్వతాలు
దూరం నుండి చూస్తేనే
అందంగా ఉండు
పాషాణ హృద్వి
అబద్ధ పర్వతాన్ని
చీల్చు ఓ చిన్ననిజం
భీకర సునామి
ప్రాచీన యుగసృష్టి
క్షణం లో మాయం
మేఘాల్ని తాకుతూ
పక్షి ఉత్సాహంగా
సాగింది పాపం
చల్లని సెలయేళ్ళు
పచ్చని చేల గట్లు
ఏవీ ఆ గ్రామాలు
గారాల బిడ్డ
అత్తవారింట్లో
గారెలా కాలిందే
జీవితం లో
కఠినమైనది
నెమ్మది తనం
వరదలు
- రాజశేఖర్, చెన్నై
1) ఆంధ్రావనిలో – వరదలొచ్చె
పంటలు కోల్పోయి – పశువులు కోల్పోయి
నివాసాలు కోల్పోయి – కుటుంబాలే చేల్లాచెదురాయె
గుండె చెదిరె గూడు చెదిరె
2) గలగల పారే కృష్ణా, జీవనదులు ప్రవహించె
కన్నీటజలమాయె రాయలసీమ,
నాటి రత్నాలసీమ, నేటి కన్నీళ్ళ సీమగా పరిణమించె
3) పచ్చని పైరులతో, పచ్చగ ఉండి
సశ్య శ్యామల తెలుగు నేలను నమ్ముకున్న రైతన్న నష్టపోయె!
4) కూడు-గూడు లేక ఆకలికేకలు
ఆర్తనాదాలు మిన్నంటుతుంటే
పాలకులే త్యాగాలు చెయ్యాలి
అందరికీ చేయూత నివ్వాలి
5) క్షణం కాదు యుగాలైన
సాఫీగా బ్రతకగలమంటు
ధీమా వ్యక్తం చేస్తున్నవారెందరికో
జీవితమంటే ఏమిటో తెలిసిపోయె
భోగభాగ్యాలు సమసిపోయె,
*****
